ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଲା ଇପିଏଫ ପେନସନର୍ସ ସଂଘ

କଟକ, ଡିସେମ୍ବର ୧୮ (ସଂଯୋଗ ମିଡିଆ) : ଓଡିଶାର ୧ଲକ୍ଷ ୬୨ ହଜାର ଇପିଏଫ ପେନସନଭୋଗୀ ବହୁ ବର୍ଷ ହେଲା ସ୍ୱଳ୍ପ ପେନସନ ପାଇ ଦୁଃଖ ଦୁର୍ଦ୍ଦଶାରେ କାଳାତିପାତ କରୁଥିବା ନେଇ ଅଲ ଓଡିଶା ଇପିଏଫ ପେନସନର୍ସ ଆସୋସିଏସନ ପକ୍ଷରୁ ବାରମ୍ବାର ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରାଯାଇଥିବା ବେଳେ ଏହାକୁ ହୃଦୟଙ୍ଗମ କରି ରାଜ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତ କାଲି ଏ ବାବଦରେ କେନ୍ଦ୍ର ଶ୍ରମ ଓ ନିୟୋଜନ ମନ୍ତ୍ରୀ ସନ୍ତୋଷ କୁମାର ଗଙ୍ଗୱାରଙ୍କ ନିକଟକୁ ଏକ ପତ୍ର ଲେଖିଛନ୍ତି ।

ଏହି ଘଟଣାକୁ ଗୁରୁତର ସହ ନେଇ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଏହି ବରିଷ୍ଠ ନାଗରିକମାନଙ୍କ ପ୍ରତି ଅବିଚାର ହୋଇଛି ବୋଲି ପ୍ରକାଶ କରିଛନ୍ତି । ସୂଚନାଯୋଗ୍ୟଯେ ଇପିଏଫ ପେନସନଭୋଗୀମାନେ ବିନା ମହଙ୍ଗା ଭତ୍ତାରେ ମାସିକ ମାତ୍ର ୩ ଶହରୁ ୩ ହଜାର ଟଙ୍କା ପର୍ଯ୍ୟନ୍ତ ପେନସନ ପାଉଛନ୍ତି । ସ୍ୱଳ୍ପ ପେନସନରେ ଏହି ବରିଷ୍ଠ ନାଗରିକମାନେ ସେମାନଙ୍କ ସ୍ୱାସ୍ଥ୍ୟଗତ ସମସ୍ୟା ଓ ଦୈନିକ ତେଲଲୁଣର ଖର୍ଚ୍ଚ ତୁଲାଇବା କଷ୍ଟକର ହୋଇପଡିଛି । ଏହି ସମସ୍ୟାର ସମାଧାନ ଲାଗି ଆସୋସିଏସନ ଅନେକବାର ରାଜରାସ୍ତାକୁ ଆସିଛି । ଏହି ଦାବିର ଯଥାର୍ଥତା ଉପଲବ୍ଧି କରି ମୁଖ୍ୟମନ୍ତ୍ରୀ ଏ ନେଇ କେନ୍ଦ୍ରମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି । ମୁଖ୍ୟମନ୍ତ୍ରୀ ତାଙ୍କ ଚିଠିରେ ରାଜ୍ୟର ୧ଲକ୍ଷ ୬୨ ହଜାର ପେନସନ ଭୋଗୀ ଅବସର ପରେ କିପରି ସମସ୍ତ ସୁବିଧା ସୁଯୋଗ ପାଇବାରୁ ବଞ୍ଚିତ ହେଉଛନ୍ତି ତାହା ଉଲ୍ଲେଖ କରିଛନ୍ତି । ଅବସର ପରେ ବୃଦ୍ଧବୃଦ୍ଧାମାନେ ଖୁବ କମ ପେନସନ ପାଉଥିବାରୁ ସେମାନଙ୍କ ଅବସର ସମୟ ବହୁ କଷ୍ଟରେ ବିତୁଛି ।

ଏହି ପରିପ୍ରେକ୍ଷୀରେ ସର୍ବ ନିମ୍ନ ପେନସନ ବୃଦ୍ଧି ପାଇଁ ସାଂସଦ ଭଗତ ସିଂ କୋଶ୍ୟାରୀଙ୍କ ଅଧ୍ୟକ୍ଷତାରେ ଗଠିତ କମିଟି ଯେଉଁ ସୁପାରିଶ କରିଥିଲା ତାହା ଆଜି ପର୍ଯ୍ୟନ୍ତ କାର୍ଯ୍ୟକାରୀ ହୋଇନାହିଁ । ମୁଖ୍ୟମନ୍ତ୍ରୀ ଆହୁରି ଦର୍ଶାଇଛନ୍ତି ଯେ, ପେନସନ ଭୋଗୀମାନଙ୍କୁ ଏକ ଆର୍ଥÒକ, ନ୍ୟାୟସଙ୍ଗତ ଓ ସାମାଜିକ ନିରାପତ୍ତା ଯୋଗାଇ ଦେବାର ଆବଶ୍ୟକତା ରହିଛି । ପେନସନ ଢାଞ୍ଚାର ସଂଶୋଧନ ଅଣାଗଲେ ବର୍ଷ ବର୍ଷ ଧରି ଅସୁବିଧାର ସମ୍ମୁଖୀନ ହେଉଥିବା ପେନସନ ଭୋଗୀମାନେ ନିଶ୍ଚିତ ଉପକାର ପାଇପାରିବେ ବୋଲି ସେ ଉଲ୍ଲେଖ କରିଛନ୍ତି । ଏଥିନେଇ ଓଡିଶାରେ ଥିବା ୧ ଲକ୍ଷ ୬୨ ହଜାର ଇପିଏଫ ପେନସନଭୋଗୀଙ୍କ ମନରେ ନୂତନ ଆଶାର ସଞ୍ଚାର ହୋଇଛି । ମୁଖ୍ୟମନ୍ତ୍ରୀଙ୍କ ଏହି ସହୃଦୟତା ଲାଗି ଅଲ ଓଡିଶା ପେସନର୍ସ ଆସୋସିଏସନ ତରଫରୁ ରାଜ୍ୟ ସାଧାରଣ ସମ୍ପାଦକ ଭାଗ୍ୟଧର ବ୍ରହ୍ମା ଗଭୀର କୃତଜ୍ଞତା ଜଣାଇଛନ୍ତି ।